ए जी थांरा टाबर झुर-झुर रोवै म्हारी माय

ए जी थांरा टाबर झुर-झुर रोवै म्हारी माय
हालरियै हुलरावण तू कद आवैली ?
कूँपा इमरत रा कद ल्यासी म्हारी माय
थाक्याँ अडीक बेल बळ जावैली ||
जलम दियां पछी सुध नहीं पूछी
ए जी हूँ तो रडतां रडतां हारयो म्हारी माय
म्हारो लाड लड़ावण तू कद आवैली || १ ||

आभै पछट्यो म्हनै धरती न झाल्यो
ए जी हूँ तो कुओ छोड़ कठे जावूँ म्हारी माय
पारेबाँ री पांत अब तो उड़ जावैली ||२||

धर्म गयो रे म्हारी धरती लेग्या
ए जी अब तो पत राजपूती री जावै म्हारी माय
रमझोला झमकाती तू कद आवैली ||३||

आवै तो छोटो सो एक खांडो लाज्ये
ए जी म्हारे बख्तरियो लेती आए म्हारी माय
थारै तो छोरु री जान चढ़ जावैली || ४ ||

सरणाई साधार कहिजे तू
ए जी थारै वचना री प्रत पालो म्हारी माय
म्हारो शीश नामंता थारीं आँख लाजैली || ५ ||

स्व. श्री तन सिंह जी : १३ नव.१९५९
;

इससे जुड़ीं अन्य प्रविष्ठियां भी पढ़ें


Comments :

1
AlbelaKhatri.com said...
on 

बधाई !

Post a Comment

 

widget

Followers